عجبى عليك ......عجبي عليك يا ابن أدم يا كبير الدار
قامت الدنيا ومقعتتش لما قالو حمار
هو اسمي شتيمه ولا جنسي ده عار
خلقني ربي وخلقك ومحدش فينا له خيار
وأنا مهما زاد الحمل فوقى صابر على المشوار
لا في يوم أقول إشمعنى أخويا وأخذ منه تار
ولا يوم ابص لرزق غيري وأطق منه وأغار
ولا ارفع في يوم عيني على جارتي وأصون الجار
ولا مهر أدفع لحمارتي وشبكه وسوار
ولا شقه أجمع في ثمنها ولا افرش دار
ولا مراتى حامل تتوحم على كافيار
ولا بنت تخرج عن طوعي وتجيبلى العار
ولا إبن يدمن ويهلوس ويقع وينهار
عايش في حالي ومتهني وليه أحتار ؟
بأكل وأشرب وأنهق وما فيش أسرار
وعندي ابن أدم يخدمني ليل ويا نهار
إن جعت يشتري برسيمي بأغلى الأسعار
وفي مرضي يفضل يعالجني ويدعي الستار
خادم أمين من غير راتب ولا حتى إيجار
وعرفت يا بن أدم .. من فينا الحمار
.............................................................................نجم
